வளமான வாழ்க்கைக்கு உதவும் விவசாய படிப்புகள்..!

வளமான வாழ்க்கைக்கு உதவும் விவசாய படிப்புகள்..! மனிதன் உயிர் வாழ்வதற்குத் தேவைப்படும் அடிப்படைத் தேவைகளில் ஒன்று, உணவு. எனவே தான் எப்போதும் விவசாய படிப்புகளுக்கு மவுசு அதிகம். வேளாண் சம்பந்தமான படிப்புகள் ஏராளமாக இருக்கும் நிலையில், அதில் சிறப்பு வாய்ந்த சில படிப்புகளைப் பற்றி தெரிந்து கொள்வோம். 

  வேளாண் பொறியியல் தற்போதைய காலகட்டத்தில், வேளாண் பொறியியல் முக்கியத்துவம் நிறைந்த பட்டப்படிப்பாக மாறி வருகிறது. இது 4 ஆண்டுப் படிப்பாகும். பிளஸ்-2 பொதுத் தேர்வில் எடுத்த மதிப்பெண்ணையும், அந்த கல்வி நிறுவனங்கள் நடத்தும் தேர்வின் மதிப்பெண்ணையும் அடிப்படையாக வைத்து இப்படிப்பிற்கான மாணவர் சேர்க்கை நடைபெறுகிறது. பொறியியல் மாணவர் சேர்க்கை மூலம் இந்த படிப்பையும், நீங்கள் விரும்பும் கல்லூரியையும் தேர்வு செய்யலாம். இந்த படிப்பில், வேளாண் துறைக்கு தேவையான கருவிகள், எந்திரங்களை வடிவமைப்பதே வேளாண் பொறியாளர்களின் வேலை. 

  பி.எஸ்சி. அக்ரிகல்ச்சர் வேளாண்மையில் இளங்கலை பட்டம் பெறுவதற்கான இந்த படிப்பை 4 ஆண்டுகள் படிக்க வேண்டும். 12-ம் வகுப்பில் அறிவியல் பாடங்களை தேர்வு செய்த மாணவர்கள் இந்த படிப்பில் சேரலாம். இந்த படிப்பில், மரபியல் மற்றும் தாவர இனப்பெருக்கம், வேளாண்மை நுண்ணுயிரியல், மண் அறிவியல், தாவர நோய்க்குறியியல் போன்றவை மாணவர்களுக்கு கற்பிக்கப்படுகிறது. 

  பி.எஸ்சி. கால்நடை வளர்ப்பு மற்றும் பால் உற்பத்தி கால்நடை வளர்ப்பு தொடர்பான இந்த படிப்பு 4 ஆண்டு இளங்கலை படிப்பு ஆகும். இதில் விவசாயத்திற்கு உதவும் கால்நடைகளை வளர்ப்பது எப்படி, பராமரிப்பது எப்படி மற்றும் அவற்றுக்கு உணவு முறை அமைப்பது எப்படி என்பதை மாணவர்கள் பயில்கின்றனர். 10 மற்றும் 12-ம் வகுப்பில் வேதியியல், இயற்பியல், கணிதம் மற்றும் ஆங்கிலம் ஆகியவற்றுடன் குறைந்தபட்சம் 50 சதவிகிதம் மதிப்பெண்கள் பெற்றவர்கள் இப்படிப்புகளுக்கு விண்ணப்பிக்கலாம். 

  பி.எஸ்சி. அக்ரி மற்றும் பண்ணை மேலாண்மை... வேளாண்மை தொடர்பான பொருளாதாரம் மற்றும் பண்ணை மேலாண்மை குறித்து இந்த படிப்பில் மாணவர்கள் பயிலுகின்றனர். இதுவும் நான்கு ஆண்டு இளங்கலை படிப்பு ஆகும். 12-ம் வகுப்பில் அறிவியல் பிரிவு படித்தவர்கள் இந்த படிப்பில் சேரலாம். 

  பி.எஸ்சி. மரபணு தாவர இனப்பெருக்கம் மரபணு தாவர வளர்ப்பு தொடர்பான இந்த படிப்பில் மாணவர்கள் பயிரிடப்பட்ட தாவர இனங்களை மேம்படுத்த மரபியல் ஆய்வுகளை மேற்கொள்கின்றனர். இது 3 வருட இளங்கலை படிப்பு. 12-ம் வகுப்பில் அறிவியல் பிரிவு படித்தவர்கள் இந்த படிப்பில் சேரலாம். 

  பி.எஸ்சி. மீன்வளர்ப்பு இந்த படிப்பில் மாணவர்கள் மீன்கள் மற்றும் அவற்றின் சூழலியல், உணவுப் பழக்கம், இனப்பெருக்க முறை போன்றவற்றை குறித்து படிக்கின்றனர். இந்த படிப்பை படிப்பதற்கு 12-ம் வகுப்பு தேர்ச்சி அவசியம். மீன்வள சூழலில் கடல்சார்வியல், லிம்னாலஜி, சூழலியல், பல்லுயிர் மற்றும் நீர்வாழ் மாசுபாடு ஆகியவை அடங்கும். மாணவர்கள் இப்படிப்பில் சேர்க்கை பெற கல்லூரிகள் மற்றும் பல்கலைக்கழகங்களில் நடத்தப்படும் நுழைவுத் தேர்வில் தேர்ச்சி பெற வேண்டும். 

  பி.எஸ்சி. வனவியல் வனவியலில் இளங்கலை அறிவியல் என்பது நான்கு வருட இளங்கலைப் படிப்பாகும், இது எட்டு செமஸ்டர்களாக பிரிக்கப்பட்டுள்ளது. மாணவர்களுக்கு வனவியல் பற்றிய அறிவையும், பயிற்சியையும் வழங்குகிறது. வனவியல் திட்டம் மாணவர்களுக்கு காடுகளை நிர்வகித்தல், புதிய தோட்டங்கள், பழைய தோட்டங்களை பராமரித்தல் மற்றும் பிற இயற்கை வளங்களை பயிற்றுவிக்கிறது. வனவியல் படிக்க ஆசைப்படுபவர்கள் சாகச மனப்பான்மை, வெளிப்புற நடவடிக்கைகளில் ஆர்வம், உடல் தகுதி மற்றும் புதிய சூழலுக்கு ஏற்றவாறு இருக்க வேண்டும். சுற்றுச்சூழலை எவ்வாறு பாதுகாப்பது என்பதில் அவர்களுக்கு மிகுந்த ஆர்வம் இருக்க வேண்டும். 

  பி.எஸ்சி. பயிர் உயிர் வேதியியல் பலவகை பயிர்களின் அமைப்பு மற்றும் பயிர்களின் வாழ்க்கை முறை பற்றி பயிற்றுவிக்கப்படும் இந்த படிப்பானது, 4 ஆண்டு இளங்கலை படிப்பு. இந்த படிப்பில் சேர விரும்பும் மாணவர்கள் 12-ம் வகுப்பில் அறிவியல் பாடங்களை படித்திருத்தல் வேண்டும். 

  பி.எஸ்சி. அக்ரி மற்றும் உணவு வணிகம் வேளாண்மை மற்றும் உணவு வணிகத்தில் இளங்கலை பட்டம் பெறுவதற்கு உதவும் இந்த படிப்பு 4 ஆண்டு இளங்கலை படிப்பு ஆகும். இந்த படிப்பில் சேர மாணவர்கள் 12-ம் வகுப்பில் அறிவியல் பாடங்களைப் படித்திருத்தல் வேண்டும். மேற்கண்ட படிப்புகளைப் படித்தவர்களுக்கு அரசு மற்றும் தனியார் வேளாண் நிறுவனங்கள், வேளாண் கருவி தயாரிப்பு நிறுவனங்கள், உர நிறுவனங்கள் மற்றும் வங்கிகள் போன்றவற்றிலும் வேலைவாய்ப்புகள் கிடைக்கும். விருப்பம் உள்ளவர்கள் அந்தந்த படிப்பு பற்றிய தகவல்களை இணை யதளத்தில் விளக்கமாக அறிந்து கொள்ளலாம். 

பி.எஸ்சி. மண் மேலாண்மை மண் மற்றும் நீர் மேலாண்மையில் இளங்கலை பட்டம் பெறுவதற்கு உதவும் இந்த படிப்பு, 4 ஆண்டுகள் பயிற்றுவிக்கப்படுகிறது. இதில் மாணவர்கள், மண்ணின் தரம் மற்றும் நீர் மேலாண்மையை மேம்படுத்துவதற்கான விவசாய ஆய்வுகளை செய்கின்றனர். மண் அரிப்பைக் கட்டுப்படுத்தும் வேளாண்மை மற்றும் பொறியியல் நட வடிக்கைகள் இதில் அடங்கும்.