பள்ளிக்கல்வித்துறை சார்பில் ஒவ்வொரு ஆண்டும் சிறந்த பள்ளிகளுக்கான பட்டியல் தயாரிக்கப்பட்டு அதன் அடிப்படையில் கேடயங்கள் அந்தந்த பள்ளிகளுக்கு வழங்கப்பட்டு வருகின்றன.
அந்த வகையில் தொடக்கக் கல்வித் துறையின் கீழ் செயல்படும் அரசு பள்ளிகளில் சிறந்த பள்ளிகளாக ஒவ்வொரு மாவட்டத்துக்கும் தலா 3 பள்ளிகள் வீதம் 38 மாவட்டங்களுக்கு 114 பள்ளிகள் தேர்வு செய்யப்படுகின்றன.
அதன்படி, 2023-24-ம் கல்வியாண்டுக்கான சிறந்த பள்ளிகளை தேர்வு செய்வதற்காக குழு அமைக்கப்பட்டது.
அந்த தேர்வுக்குழு அளித்த பரிந்துரையின் அடிப்படையில் ஒவ்வொரு மாவட்டத்திலும் 3 சிறந்த பள்ளிகள் தேர்வு செய்யப்பட்டு, அதற்கான பட்டியலை தொடக்கக் கல்வித் துறை தற்போது வெளியிட்டு இருக்கிறது.
சென்னையை பொறுத்தவரையில், சைதாப்பேட்டை சென்னை தொடக்கப்பள்ளி, சென்னை ஸ்ரீ ஆர்.கே.எம்.எஸ்.வி. மாதிரி தொடக்கப்பள்ளி, பழைய வண்ணாரப்பேட்டை தனலட்சுமி தொடக்கப்பள்ளி ஆகிய 3 பள்ளிகள் தேர்வு செய்யப்பட்டுள்ளன.
தேர்வு செய்யப்பட்டுள்ள பள்ளிகளுக்கான கேடயங்கள் வழங்கும் நிகழ்ச்சி சென்னை சாந்தோம் மேல்நிலைப்பள்ளி வளாகத்தில் வருகிற 14-ந் தேதி (வியாழக்கிழமை) நடைபெற உள்ளது. இதில் தேர்வு செய்யப்பட்ட 114 பள்ளிகளின் தலைமை ஆசிரியர்கள், அந்தந்த பள்ளிகளில் பணிபுரியும் ஆசிரியர்கள், வட்டாரக் கல்வி அலுவலர் ஆகியோர் கண்டிப்பாக பங்கேற்க வேண்டும் என்று கல்வித்துறை உத்தரவிட்டுள்ளது.
ليست هناك تعليقات:
إرسال تعليق