மாற்றுத்திறனாளிகள் இனி பயண சலுகை அட்டையை ஆன்லைனில் பெறலாம்! தெற்கு ரெயில்வே அறிவிப்பு

ரெயில்களில் பயணம் செய்யும் மாற்றுத்திறனாளிகளுக்காக ரெயில்வே நிர்வாகம் கட்டண சலுகையை வழங்கி வருகிறது. இந்த சலுகையை பெற மாற்றுத்திறனாளிகளுக்கு ஒரு அடையாள அட்டை வழங்கப்படுகிறது. அடையாள அட்டையை பெற மாற்றுத்திறனாளிகள் மருத்துவ சான்றிதழ் உள்ளிட்ட முக்கிய ஆவணங்களை ரெயில்வே கோட்ட அலுவலகங்களுக்கு நேரடியாக சென்று சமர்ப்பிக்க வேண்டும். 

பின்னர், உரிய பரிசீலனைகளுக்கு பிறகே மாற்றுத்திறனாளிகளுக்கு அடையாள அட்டை கொடுக்கப்படுகிறது. இந்த நிலையில், இந்த நடைமுறையை எளிமைப்படுத்தும் விதமாக ஆன்லைன் வழியாக மாற்றுத்திறனாளிகள் ரெயிலில் பயணம் செய்ய அடையாள அட்டையை பெறலாம் என தெற்கு ரெயில்வே தெரிவித்துள்ளது. இதுதொடர்பாக, தெற்கு ரயில்வே வெளியிட்டுள்ள செய்திகுறிப்பில் கூறியிருப்பதாவது:- 

கட்டண சலுகை உள்ள அடையாள அட்டையை பெற விரும்பும் மாற்றுத்திறனாளிகள் https://divyangjanid.indianrail.gov.in/ என்ற இணையதளத்தின் வாயிலாக விண்ணப்பிக்கலாம். மருத்துவ சான்றிதழ் உள்ளிட்ட உரிய ஆவணங்கள் கொண்டு விண்ணப்பிக்க வேண்டும். உரிய பரிசீலனைகளுக்கு பிறகு, இணையதளத்தில் இருந்தே மாற்றுத்திறனாளிகள் அடையாள அட்டையை பதிவிறக்கம் செய்து கொள்ளலாம். இவ்வாறு அதில் கூறப்பட்டு உள்ளது.